Um tributo pa Afrika (parte II)

 Igrejas ta continua pa perpetua ignorancia na meio di nos povu hora kes ta sukundi impurtanti factus sobri Afrika na Biblia Sagrada. Por exemplu es ka ta fla ma Egiptu, Ethiopia e Faraoh sta mencionadu centena di bez, enkuantu Europa poku bes ta mencionadu na Biblia.  Na livro di Profeta Isiah o Isaias, Africa ta louvadu munti bes.  Busca verdadi e verdadi ta libertou.  Santa Trindadi ixisti na Egiptu milharis di anus antis di kualker povu e civilizason kumesa ta fala del.  Kes ki Gregus ta tchoma di Osiris, Isis, e Orus e represantativu di santa trindadi na Afrika.  Povu di Egiptu tinha 42 Mandamentu ki tudu na nos terra ta siguiba e ruspetaba. Conxedu pa 42 Confeson di Maat, e di la ki ben 10 mandamentu ki nu ten hoji na Biblia Sagrada. Mandamentu di Egitu e 2000 mas antigu ki Cristianismu.  Si bu le kes livrus screbedu pa filosofos Gregus sima Socrates, Pliny, Plutarch, Aristoteles, Aristotenes, bu ta discubri grandis verdadi sima factu ki povu di Etiopia ki construi cidadi di Israel.  Termu Israel ben di junson di crenca di Egiptu e povu Hebraico Afrikanu.  Nunka es ka ta flanu di kes Hebraicos Judeus Africanos ki ta mora na Etiopia ki bai la na tempu di Rei Salomao.  Propi Salomao ki tivi si prumeru fidju ku um Rainha Africana di Etiopia.  Kel storia li sta parcialmenti na Biblia, mas factus fika sukundidu.  Pa bu contra ku kel verdadi li bu tem ki le kel livru sagradu di nomi "Gloria dos Reis" di Etiopia.  Modi ki um povu ki tinha tantu spiritualidadi hoji ta ser Cristianizadu e Civilizadu pa kel mesmu povu ki nu iduka na passadu???  Perguntas sem resposta.  

     Mas pa frenti nu ta maravilha ku criatividadi di Piramidis ki nos Antipassadu construi.  Enginharia di mundu interu e arkitetura mudernu ka ta consigui construi piramidis.  Es ta fla ma nu usa scrabus na construson di piramidi, mas kela e mintira.  Enginharia mudernue e Arkitetura ka sta podi splika modi ki nu konsigui na passadu poi munti milhao di pedras di granitu riba kumpanheru ki inda oji nem um folha di papel ka ta kamba entri kes pedras di granitu.  Ciencia mudernu ka ta consigui splika modi ki nu transporta kes pedras atraves di Riu Nilo.  Nilo e riu mas grandi na planeta terra.  E la ki civilizason humanu forma.  
     Rio Nilo e um "autostrada" di kultura e civilizasons pamodi si nu sigui percurso di agua di Nilo di undi ke ta naci pa undi ki agua ta termina, nu ta da conta di varius civilizasons ki dizemvolvi la milharis di anus antis di Europa conxeba Civilizason.  

     Keli kin sta fla nhos e tudu verdadi.  E ka racismu mas sim kes parti di storia di nos Continenti ki ta sukundidu sempri pa nu ka da conta di tantu contribuison ki dja nu da pa civilizason Humanu.  Propi palavra Humanu ben di djunta termu HUE ki significa COR ku MAN.  HUE=COR MAN=HOMEM.  Homi di cor ta representa povu Afrikanu e tudu otus di Asia, Continenti Sul Americanu, Nativus di Merca, Nativus di Australia.  Kes povu ki oji sta mas maltratadu, na tempu mas atras era kes ki mas avansadu staba na tempu.

        Si nu sigui mas tempu pa frenti, nu ta continua ta maravilha ku intiligencia e ciencia avancadu di nos liders Afrikanus di um manera incrivel.  Nu tinha Universidadi na cidadi di Timbuktu milharis di anus antis di Europeus tchiga na Africa.  Na cidadi di Timbuktu na Universidadi milharis di studantis ta studaba la.  Cidadi tinha ruas calcetadu.  Tudu cidadi staba urbanizadu e pa bu bai di principiu pa fin di Timbuktu ta anda e ta lebaba un dia interu di viagi.  Ora kes ta fla ma Afrika ka tem storia nem civilizason bu ta contas di kes ki bu obin ta passou.  Ka bu dexa ninguem nganou ma bo e ka ninguem.  Ka bu dexa ninhum professor flou ma bo bu ka ten storia.  Tudu sta sukundidu na fundu di Humanidadi.  Mas si nu buscal, nu ta atchal certu.

    Na Mali kantu Portugueses tchiga la, es atcha Africanus ta dizemvolvi economia local na basi di benda e troka di livrus.  Livrus ki tinha mas valor ki Oru e Prata.  Kela e pa mostrou modi ki nos nu screbi livrus pa milharis, e modi ki nu da valor a Ciencia, Midicina, Arkitetura, Enginharia, Spiritualidadi, e Humanidadi.  

     Ntem milhares di factus verdaderus pa conta nhos, mas espasu e tempu e limitadu.  Kuze ke ka limitadu e nos vontadi di busca nos storia e conxi nos valor e contribuison na storia di humanidadi.  Dia di Afrika e tudu dia pamodi ka tem un dia ki mudjer, Homi, e fidjus di Afrika para di da contribuson pa storia di tudu humanidadi.  Nos e ka scrabus.  Nu fazedu di scrabus.  Nos e ka incapaz. Nos e mas ki kapas.  Afrika tinha um civilizason mutu mas avansadu ki nos propi sociedadi di hoji.  Mas es ka ta ben dou tudu kes informason li pamodi nos povu ka conxi si storia ki fari pa contal.  Nos storia ka ta kumesa ku barcu caregadu di scrabus.  Keli ta representa fim di Afrika e distruison di nos continemti.  Holocaustu Afrikanu kumessa kantu kel prumeru 12 escrabus lebadu di costa di continenti pa barcu di Portuguesis na 1411.  Mas di 200 Milhoes di Africanus tradu di nos continemti e foi lebadu pa Merca e Europa pa construi kes parti la di mundu.  Por issu ki Merca e Europa oji e rico.  E pamodi nos povu lebadu pa la pa construi kes sociadadi la baxu di trabadju forcadu e nunca nu ka pagadu um dia pa dizemvolvi Merca e Europa.  Si kes barco pirata ka tchigaba na costa di Afrika, kusas ta serba completamenti diferenti.  

Maior disgrasa ki contici na storia di Humanidadi foi scravatura ki fazedu ku povu Afrikanu.  Nos Holocaustu ta tchomadu di MAAFA.  Mas nu sta caminha pa SANKOFA ke kel kaminhada pa rucuperason di nos storia e humanidadi, sen vontadi di vinga di kes ki tantu maldadi fazenu.  Kada un ta nxina kumpanheru na basi di mutu amor, nu ta djuda rucupera e cura nos Mai Afrika ti ke labanta di si sufrimentu pamodi Afrika e mutu forti. 
    500 anus di sufrimentu e scravatura ka kaba ku nos.  Nha povu nu uni pa nu consigui tchiga terra promitida ke nos propi Continenti Afrikanu.
     Paz pa Afrika Continental.  KADAMAWI