Tcheu é vez ki djam começa nha dia ti
entra noti e mi ku idea e ti n´pode fla nha chintido é na “nha terra”, lá é
undi kim começa dá primeros passos, fla primeros sílabas, odja primeros
árvores, prendi comé, embala primeros sonos, enfim, é na nós terra ki ta começa
projeto di kel ki nós nu é na dias di hoji, um bom Criolo sempre ta fla sabura
é na nós terra, mas necessidade tcheu vez é mas grandi ki nós vontadi e por
isso nu ta cria dentu di nós um mester de odja otus kusas, prendi ku otus povos
e alcança otus horizontes e tudo keli ta lebanu a separa di o ki nu tem di mas
grandi ki é nós Pátria, mas mesmo assim por mas longi ki nu stiver de nós terra
sempri nu ta lembra na el ku um carrinho tcheu spicial e ti npode fla nós porto
seguro.
Tudo kenha ki sai de se terra, lá na
fundo di sis sentimento é ta kré volta pa ki é podi tem certeza di ki é
completa um ciclo ki é di bai e retorna, e hora ki nu volta é sempre
gratificanti pamodi tudo nós amigos ta fica nós volta e cada um ta contanu kusas
ki é fazi e modi ki nu passa longi de casa, na maioria de vez “inimigos” ki nu
dexaba dja ka é mas insensivel a nós e é alguém capaz de supera desavença e
danu se perdom.
Mas sodade mesmo é um sentimento
difícil de splica, el é um sensason de vazio e de incompleto ki ta invadi nós
ser e ta ocupa nós interior sima ki dja nu ka teni mas sangui ta circula na nós
veias, de mesmo modu é sodade ki ta fazenu liberta di kusas maus e dá mas valor
a tudo kel ki é possitivo, prospero e ki ta cria union, é ta fazenu kria e bira
mas maduro dentu di nós mesmo ti a pontu de nu kré fazi projetos pa nós terra e
contribui pa si midjoria e de nós povu.
Cidade de Lisboa, 27 de Junho de
2013.
Texto: Hélder Levy Cardoso